بۇگىن پارلامەنت ءماجىلىسىنىڭ توراعاسى نۇرلان نىعماتۋلين وزبەكستاننىڭ قازاقستانداعى توتەنشە جانە وكىلەتتى ەلشىسى سايديكرام نيازحودجاەۆتى قابىلدادى, دەپ ءحابرلايدى ماجىلىستىڭ ءباسپاسوز قىزمەتى.
ن.نىعماتۋلين مەيماندى ەلشىلىك قىزمەتىنىڭ باستالۋىمەن قۇتتىقتاپ, ونىڭ مەملەكەتتىك قىزمەتتەگى مول تاجىريبەسى ءبىزدىڭ ەلدەرىمىز اراسىنداعى ارىپتەستەكتىكتى ودان ءارى نىعايتۋعا ىقپال ەتەتىنىنە سەنىم ءبىلدىردى.
ءماجىلىس سپيكەرى اتاپ وتكەندەي, وزبەكستان قازاقستاننىڭ ورتالىق ازياداعى ماڭىزدى ستراتەگيالىق ارىپتەسى.
بۇگىندە قوس ەل پرەزيدەنتتەرى نۇرسۇلتان نازارباەۆ پەن شاۆكات ميرزيەەۆتىڭ ءوزارا تۇسىنىستىك پەن تاتۋ دوستىققا نەگىزدەلگەن بىرلەسكەن ءىس - قيمىل ناتيجەسىندە كوپقىرلى ىنتىماقتاستىقتى جوعارى دەڭگەيدە دامىتۋعا قول جەتكىزىلدى.
پالاتا توراعاسى ايماقتىق جانە شەكارالىق ارىپتەستىكتىڭ دامۋ دەڭگەيىنە كوڭىل ءبولىپ, وسى جىلى تۇڭعىش «قازاقستان – وزبەكستان» ايماقارالىق فورۋمى وتەتىنىن, ول ەكى مەملەكەت اراسىنداعى ساۋدا-ەكونوميكالىق ىقپالداستىققا جاڭا سەرپىن بەرەتىنىن اتاپ ءوتتى.
كەزدەسۋ بارىسىندا مادەني سالاعا دا ايرىقشا نازار اۋدارىلىپ, وسى رەتتە س.نيازحودجاەۆ ەكى ەلدىڭ ۋاقىت سىنىنان وتكەن تاريحي تامىرلاستىعىن العا تارتا كەلىپ, ەكى ەل باسشىلارىنىڭ وتكەن جىلعى مەملەكەتتىك ءىس-ساپارلارى ەكىجاقتى قارىم-قاتىناستىڭ جاڭا بەلەسىن باستاعانىن ايتتى.
تاراپتار پارلامەنتارالىق ءوزارا ءىس-قيمىلدى كۇشەيتۋدىڭ ماڭىزدىلىعىنا توقتالدى.
وسى ورايدا ماجىلىستە قۇرىلعان وزبەكستانمەن ىنتىماقتاستىق جونىندەگى جانە ولي ماجىلىستەگى قازاقستانمەن دوستىق توپتارى ەكىجاقتى, سونىڭ ىشىندە, پارلامەنتارالىق بايلانىستاردى تەرەڭدەتۋدە ىقپالى زور ەكەندىگى جانە ولاردىڭ الەۋەتىن بەلسەندى پايدالانۋ كەرەكتىگى ايتىلدى.